Uyghur Oqughuchilar Munbiri
Uyghur Oqughuchilar Munbiri

yawrupada oquwatqan, we yawrupagha kilip oqushqa qiziqidighan uyghurlar üchün pikir almashturush supisi
 
HomeHome  Uyghur Latin YiziqiUyghur Latin Yiziqi  CalendarCalendar  GalleryGallery  IzdeshIzdesh  XetküchlerXetküchler  FAQ (Soal-Jawablar)FAQ (Soal-Jawablar)  TizimlitishTizimlitish  mushtir bolungmushtir bolung  Kirish  
Latest topics
» Yengi Eza(lar)din Munber Ehlige Salam
by alibay 19.07.12 11:59

» 2012-yilliq wetendin kelgen oqush mukapat puligha iltimas qilish waqti toshup qaldi
by oghuzkb 02.05.12 3:25

» nijat hoshur akimizning körgezmisi yerlik xewerlerde
by oghuzkb 19.03.12 17:40

» Pseudomonas xinjiangensis sp – wetendin tepilghan bakterye
by Esra 28.12.11 13:37

» تۈركىيەدە ئوقۇش
by oghuzkb 26.12.11 2:47

» Germaniyege oqushqa kelgen zhongguoluq oqughuchilarning ozini tizimgha aldurush jedwili
by oghuzkb 19.11.11 14:36

» uyghur dokturlar heqqide
by Mung_kuy 10.09.11 11:19

» Xosh Xewer: Xinjiang tewelikidiki her millet oqughuchilirigha 2011. yildin bashlap oqush mukapat puli birildu.
by oghuzkb 05.09.11 4:26

» uyghur akadimyesige i'ane
by oghuzkb 30.08.11 13:57

ulinishlar
meripet

UA

Biliwal

UKIJ

Yulghun

TipTop

TipTop

meripet

Share Tewsiye
Diqqet

Bu peqet bir ilmi pikir almashturush supisi. eger bu yerdiki yazmilarda bashqilarning eser hoqoqigha, kishilik hoquqigha, jungxua xeliq jumhuryiti we yazghuchi özi yashawatqan dölettiki qanun-siyasetlerge xilapliq qilinidighan ehwal körülse, munbirimiz jawabkarliqni üstige almaydu, yazma yazghuchi özi ige boloshi kirek!


Share | 
 

 uyghurda kesipchanliq

Aldinqi Téma Kéyinki Téma Go down 
AptorMeséj
oghuzkb
10.oghuz
avatar

Yézilmilar Sani : 400
töhpe : 846
tizimlatqan waqti : 2009-05-31
yishi : 37
Orni : Ulm, Germany

YollashMawzu: uyghurda kesipchanliq   22.11.09 18:33

(eskertish:konya yiziqtiki nusxisi peste birildi)

90-yillarda metbu'atlarda millitimizdiki illetlerni sökidighan eserler xilila diqqitimizni tartqan idi. "yiraq qirlardin ana-yerge salam", "bizdiki ebgaliq" qatarliq eserler manga hemmidin tonushluq. Bu eserler heqiqeten bizdiki bezi ejellik nuqsanlarni körsitip bergen idi. Bolopmu öz yurtimizdiki yer-jay namlirini yat tillarda atishimiz, tilimizgha kelse-kelmes yat sözlerni arlashturghinimiz, musulman turup tazliqqa ehmiyet bermeslikimiz digendek... bir tereptin bu xil eserlerni oqiwirip kitabta nimini toghra dise shuni toghra dep chong boliwatqan manga oxshash bir uyghur oqughuchi özidiki xilila köp illetlerni tüzitiwalghan bolsimu, yene öz nöwitide, unchilik köp “illetler”ge tolghan bir milletning kelgüsige nahaytimu passip, ishenchsiz qaraydighan qilip qoyghan idi.

kiyin oqush munasiwiti bilen Beijing gha barduq, öz qewmimizdin ayrlip pütünley yat bir muhitta yashash bizge millettiki illet hem artuqchiliqlarni küzitishke,silishturushqa yaxshi muhit yaritip berdi. Dimisimu bizde rast bezi illetler barken. Yeni shu yat medeniyettiki sawaqdashlirimizgha silishturghanda biz horuniraq iduq. Likin bu hem omumi ehwal emes idi, bizdimu shundaq bir yaqtin ishlep bir yaqtin oquydighan, a'ilisidin pul sorash emes belki a'ilisige pul ewetidighan tirishchan uyghur oqughuchilar bar idi. Töt yilliq oqushtin kiyin rastimni iytsam özimizde millet süpitide putamigha chiqqudek birer kemchilikni his qilalmidim. Bu yerde peqet birla iniq periqni misal ilish mumkin. Yeni, biz azla bala iduq, likin hepte axirida birge putbol oynayttuq. Gerche köpinchimizning tixnikisi nachar bolsimu, qandaq komanda bilen oynayli asasen utattuq. Bu yerdiki achquch, meyli qandaq shekilidiki putbol oyuni bolsun, özimizni urup oynayttuq. Qinimiz qizattiki bir bashliduqmu 2-3 sa'et toxtimay yügirep oynayttuq. Xeqler bizni bu shinjangliqlarning beden sapasi yaxshi dep maxtishatti, emelyette bizmu shundaq harattuq, shundaqtimu wujudimizdiki bir xil roh qedimimizni toxtatmaytti, xeq boldi qilghuche biz boldi qilmayttuq:-)

beijingdiki oqushumni tamamlap, dawamliq oqush üchün gérmangha keldim. Sinipimda bir létwaniyelik sawaqdishim bolop, waskitbolgha bekla amraq idi. Kiyin u her jüme küni siniptiki xitay balilargha qoshulup oynaydighan boldi. Bir küni mendin soraydu, bular zadi qandaq musabiqe oynaydu dep, qarisam bir xil narazliq chiray. Uninggha yarimighan yiri: bular peqet nomur sanimaydiken, bek jim oynaydiken, bir xil ölük atmusfirada oynaydiken, numur ilip warqirap qoysang zangliq qilip külidiken digendek. Anglap ichimde külüp kettim. Eyni waqitta Beijingda putbol oynighandimu bizning jan tikip oynishimizni xeqlermu bir xil yawayliq teriqiside qaraytti. Junggu putbulining meghlubiyitinimu shu yerdin bileleysiz, putbul bir jiddi tenherket süpiti bilen kishilerdin zireklik, chaqqanliq hem chidamliq telep qilidu, bu xil telep teb'ila putbolni ottek hayajan, yüksek qizghinliq bilen baghlaydu. Dimek bu xil telep jungguning 5000 yilliq tarixi bilen zich baghlanghan addiyliq/ottura-halliq ( 中庸之道) bilen mas kelmise kirek. Elwette bu xil hayat qarash yaki pelsepe iqimning özige chushluq artuqchiliqi bar. Yotqangha qarap put sunidu, bek ashurwetmeydu, haraq ichsimu muwapiqida ichidu digendek. Mawzidungmu eyni waqitta yaponlar bilen udul urushtin saqlinip, “uzaqqa sozolghan urush” taktikisi bilen bayqush yaponlarni yillarning zirikishlik tozanlirida halsizlandurup axiri meghlub qildi. Mana teywennimu qayturwalimiz digili qaywaqit, eger bashqa birer el bolghan bolsa hazirghiche urush bolop bolatti belkim. Xeyir bu toghrisida uzun toxtilishning orni yoq, peqet semimizge silip ötüshlük bir yer bar. Eyni waqitta mu'ellim birer wezipe bergen bolsa, shu sawaqdashlirimiz qolining uchidila qilip qoyidighan. Ular üchün shu wezipini pütürsila boldi, jeryanning qandaq boloshi, netijining qandaq boloshi muhim emes, mukemmellik qoghlashmaytti. Eng köp ishlitidighan jümlisi “mundaqla qilip qoysaq boldighu; qolning uchidila qilip qoyili” ( 凑合 凑合就行啦; 勉强一下) digendek. Qaraydighan bolsaq, bu xil qolining uchidila qilip qoyush bularning hayatidiki hemme tereplerge singip ketkendek qilidu. Shunglashqimu bu dölettin mushu kemgiche birer Nobel mukapati alghan adem chiqqini yoq.

Emdi özimizge kileyli. Belki eng burunqi bowilirimiz charwichiliq bilen shughullanghachqimu, qinimiz bir xil qizziq, men buni töwende at-mijez dep izahlaymen. At --- öy haywanliri ichide eng sezgür, eqilliq, ürkigek(bir nerse bek asan tesir qilidu) hem qaram. Harwidin qaytip ketken atni harwigha qayta ügitish mumkin emes disingiz bek xatalashmaysiz; At göshi yep baqqanlar bilishi mumkin, qinining renggi ziyade qizil bolidu, teb'iti issiq. Bu xil at-mijez medeniyet qehirmanliqni ulughlaydu. Hile-mikir bilen taza xoshi yoq, eksinche chöcheklerde hile-mikir peqet jadigerlerning alahidiliki. Bu yerde bu xil qizziqqanliqning kemchilikide toxtalghum yoq. Eng muhimi mushu xil alahidilik hazirqi uyghur medenyitide qandaq öz ipadisini tapqanliqi üstide aziraq söz qisturghum bar. Menche bizdiki qizziqanliq bizdiki kesipchanliqning alahide boloshigha biwaste asas bolghan. Töwende bu qarashni quwwetlesh üchün özimizge tonushluq bir qanche misallarni aldim:

Tenherket türliridiki qizziqqanliqimizni abiyam toxtilip öttüm, gerche u peqet oquwatqan oqughuchilarning bir misali bolsimu, junggu tenherket sahesidiki Uyghurlarning muweppeqyetlirila bizge fiziologiyelik jehettiki uyghur qiziqqanliqgha yiterlik ispat bolidu dep oylaymen. Dimek buning özi bir kesipchanliq, shundaq qizziqqan boloshingizning özi shu kesipke özingizni bighishlighanliq bilen oxshash emesmu?!

xosh, emdi nezirimizni bashqa sahalerge tashlap baqayli. Sen'et, bolopmu ussul ezeldin özige ottek qizghinliq (passion) ni belge qilidu. Hayajanni, qizghin hissiyatni ipadilesh uning nishani. Ispanlarning tangosi, brazilyeliklerning Sambasi hem afriqiliqlarning yerlik milli usulliri ularning tenherket türliride qolgha keltürgen netijilirining arqisida. Meyli qaysini misalgha alayli, mukemmelliking chiki yoq, yeni her qandaq bir artis öz herkiti arqiliq insan fiziologyisige jeng ilan qilip turidu. Bu xil özini urush, barliqini bighishlash her qandaq bir kesip igiside boloshqa tigishlik nerse. qisturma: Bir qitim afriqiliq bir dostum bir türklerning toy murasimigha qatniship keptiken, xoshalliqini basalmayla qaptu. Uni hemmidin xosh qilghini toydiki ussul boptu, xuddi özini afriqigha birip kelgendek his qilip kitiptu, diyishiche afriqidimu toy bolghanda ussul hemmidin ewjige chiqidiken.

uyghur ussuligha qaraydighan bolsaq özimizdin pexirlenmey turalmaymiz. Uyghur usulining eng burunqi shekillirini tengritaghlirining qiyatashliridin tapmiz, shu ejdatlirimiz uzun zamanlar mabeynide shunchilik tereqqi qilghuzghan idiki, hazirgha kelgende türining molluqi, sheklining köp xilliqi bilen dunya medeniyitide özigiche orun tutidu. Bu xil ussulgha hirismenlik bizge herqandaq yingiche shey'ige yüksek ishtiyaq bilen qaraydighan xaraktérni singdürgendek qilidu. Bu yerde bir nersini qisturush artuqche bolmas. Bizdiki moda qoghlishish, rengge bolghan sezgürlük bekla alahide, bu jehette italyilik bilen fransozlardin hergiz qilishmaymiz. Aldinqi esirning 30-yillirida roslarning tesiri bilen kiregen shepke, kastum burulka kiyish peqet nechche yildila omumlashqan bolsa, u nersiler bizdin nechche on yil burun kirgen shangxeyge texminen yirim esirdin uzun waqittimu tamamen omumliship ketmigen(buni bir maqalide oqughan idim).

Meyli uyghur zerger bolsun, binakar ustisi bolsun, nawaychi, baghwen bolsun, eng addisi mozduzchi, maylamchi bolsun ulardiki kespichanliqni bashqa yerdin asan tapalmaysiz. Rastimni iytsam bu tereplerge burun taza diqqet qilip ketmeptikenmen. bilimlik kishiler bilen paranglishish ademge zadi köp payda biridu zadi. Bir qitim Fizika penliri boyiche doktur ashti Memetimin Abbas akimiz bilen bir parangliship qalduq. Parang dawamida memtiminkam Ürümchidiki ayagh maylaydighan balilarning gipini chiqirip qaldi. “ qaranglar shu balilargha, gerche shu ishlarni amalsizliqtin qilwatqan bolsimu shundaq bir zoq, shundaq bir ishtiyaq bilen qilidu, axirida qilghan ishidin putaq tapalmaysiz; ademlirimizde öz kespige qizghinliq alahide...” shuningdin kiyin her qitim Ürümchidin ötkinimde döngköwrük doqmushidiki shu balilargha bir ayiqimni maylitip ötidighan boldum. Memtiminkamning digenliri rast idi, ular shundaq ishtiyaq bilen bérilip qilatti, öz heqqini halallap alatti. Gerche 50 tiyinliq ish bolsimu sizni razi qilip yolgha salatti. Bir tereptin ularning shu xil rohigha cheksiz hörmitim qozghalsa, yene bir tereptin “ (mektepte) oqushni xalamsen?” digen su'allirimgha ünchiqmastin bir xil amalsizliq arlashqan közlirini ittik qachurup bishini lingshitip qoyghan siyaqi ichimni achchiq qilatti...

kichik waqtimizda bir tebi'et derisi biridighan mu'ellimimiz bolidighan. Bir küni welispétige kichik mator ornitiwaptiken, welispét moturghila ayliniptu. u chaghda yizimizda motur yoq idi, undaq nersilerni kinolarda körüp qalattuq. U mu'ellimimizning qilghan ishi bizge xilila ilham bolghan idi, qiziqishimizni basalmay arqisidin yügrep yürgen iduq. Bundaq misallar bizde az emes. Tixi nechche yillarning aldidila turpandiki bir fizika mu'ellimi özi ayrupilan yasap muweppeqiyet qazandi. Gerche u ayrupilan bir iptida'i sheklide bolsimu, bizning shara'itimizda shundaq bir ishni qilish heqiqeten asan'gha toxtimaydu. Bu shu qirindishimizning öz qiziqishi üchün hichnersidin qorqmaydighan rohini, öz kespige otluq muhebbitining barliqini ispatlap turuptu. Mana bumu uyghurdiki kesipchanliqning yen bir ipadisi. Del xelqimizde mushundaq kespichanliq rohi bolghacha, bizde toloq bir zamaniwi simfoniye orunlashqa yetküdek milli chalghular bar; dunyaning nerige aparsa xeqning közini qamashturghudek gilemlirimiz bar; rengdarliqni özige mujessem qilghan doppilirimiz, etleslirimiz bar; özimiz tarixtin buyan yitishtürgen 800 din artuq üzüm sorti bar; yene iytip tügitip bolmaydighan qol-hönerwenchilik buyumliri bar...

dadamning matur heydeshtin bashqa höniri yoq idi, likin dadamning bizni hemmidin bek qayil qilidighan yiri, meyli nime ish qilsun nahayti tüjüplep, inchike qilatti. Tam soqsaq pishshiq bolmaydu dep bizni harghuche chingditatti, yene shuningha ishesh qilmay bizdin kiyin özi chiqip yene chingdaytti. Hoyligha sewze térimiz dep kürek bilen yer aghdursaq bek chongqur bolushini telep qilatti, bizmu telepke yitish üchün bar küchimiz bilen kürekni tik basattuq. Dadamni emdi razi bolidughu dep tursaq, kilipla kürekni birla sanjipla yene téyiz bolop qaptu deyitti, razi bolghan teqdirdimu chirayigha chiqarmay kitip qalatti, shuning bilen tiximu tirishattuq. Inim oqushqa qiziqmay öyde mal-warangha qarap qaldi, likin shu inimmu mini qol qoyghizidu. özi atqa amraq, mehellimizde birer yüzdin artuq at bar, 600 din oshuq kala bar. Bu inim yiraqtinla meyli kala bolsun at bolsun kimninglikige höküm qilip bolidu (manga nisbeten hemmisi oxshashla rengde), qoylarning yilinini tutup körüpla qachan qozilaydighanliqini diyeleydu:-) Körüp turupsizki, kesipchanliq rohini siz Uyghur jemyitining eng addi höjeyrisidimu köreleysiz. Bundaq mukemmelikke intilish kesipchanliq sheklide bizde öz ipadisini shundaq yaxshi tapqandek qilidu.

Emdi özimiz turwatqan döletlerdiki xeliqlerge bir silishturup köreyli, bizdiki kesipchanliq artuq tursa turiduki kem turmaydu. Shunga qandaqla bir uyghur perzenti dunyaning nerigila barsun, wetinini bashqa herqandaq biridin öte sighinidu, bizni sighindurghan peqet kawap bilen leghmenla emes. Bizdiki kesipchanliqni özige asas qilghan shundaq mol medeniyet bashqa yerlerdin asan tipilmighachqila wetenni herqandaq biridin aldirap sighinimiz, meyli bizdiki issiq xaraktir bizni bashqilar bilen tizla yiqin qilip ziriktürmisimu yenila wetenni sighinimiz:-)

xatéme süpitide oqurmenge iytidighinim, öz kespimizge pishshiq bolayli, öz kespmizni hayatni qandaq söysek shundaq söyeyli. Shu maylamchi balilardiki kesip rohi bizdimu artuqi bilen bolsun! Diqqet qilayli, bizge yiqin xoshinilarning “qolining uchidila” ish qilidighan illetliri bizge yuqup qalmisun. Bowimiz mehmud qeshqiri özining alamshumul lughitini yizish üchün 15 yil yurt kezgen iken, shu ata-bowilirimizdin qalghan kesipchanliq bizge kelgende toxtap qalmisun! Özingizdin her da'im sorap turung, kespingizge qanchilik puxta boldingiz? kespingiz üchün qandaq asas siliwatisiz?


oghlaq iyining 23-küni, shehri Ulm.
oghuzkb

_________________
ilxatérem


Eng axirqi qétim oghuzkb teripidin 24.11.09 4:04 da özgertildi, jem'iy 3 qétim özgertildi.
Choqqigha qaytish Go down
http://www.uni-ulm.de/~bkuerban/
oghuzkb
10.oghuz
avatar

Yézilmilar Sani : 400
töhpe : 846
tizimlatqan waqti : 2009-05-31
yishi : 37
Orni : Ulm, Germany

YollashMawzu: kona yiziq shekli   22.11.09 19:03



ئۇيغۇردا كەسىپچانلىق

90-يىللاردا مەتبۇئاتلاردا مىللىتىمىزدىكى ئىللەتلەرنى سۆكىدىغان ئەسەرلەر خىلىلا دىققىتىمىزنى تارتقان ئىدى. "يىراق قىرلاردىن ئانا-يەرگە سالام"، "بىزدىكى ئەبگالىق" قاتارلىق ئەسەرلەر ماڭا ھەممىدىن تونۇشلۇق. بۇ ئەسەرلەر ھەقىقەتەن بىزدىكى بەزى ئەجەللىك نۇقسانلارنى كۆرسىتىپ بەرگەن ئىدى. بولوپمۇ ئۆز يۇرتىمىزدىكى يەر-جاي ناملىرىنى يات تىللاردا ئاتىشىمىز، تىلىمىزغا كەلسە-كەلمەس يات سۆزلەرنى ئارلاشتۇرغىنىمىز، مۇسۇلمان تۇرۇپ تازلىققا ئەھمىيەت بەرمەسلىكىمىز دىگەندەك... بىر تەرەپتىن بۇ خىل ئەسەرلەرنى ئوقىۋىرىپ كىتابتا نىمىنى توغرا دىسە شۇنى توغرا دەپ چوڭ بولىۋاتقان ماڭا ئوخشاش بىر ئۇيغۇر ئوقۇغۇچى ئۆزىدىكى خىلىلا كۆپ ئىللەتلەرنى تۈزىتىۋالغان بولسىمۇ، يەنە ئۆز نۆۋىتىدە، ئۇنچىلىك كۆپ "ئىللەتلەر"گە تولغان بىر مىللەتنىڭ كەلگۈسىگە ناھايتىمۇ پاسسىپ، ئىشەنچسىز قارايدىغان قىلىپ قويغان ئىدى.

كىيىن ئوقۇش مۇناسىۋىتى بىلەن بيىجىڭ غا باردۇق، ئۆز قەۋمىمىزدىن ئايرلىپ پۈتۈنلەي يات بىر مۇھىتتا ياشاش بىزگە مىللەتتىكى ئىللەت ھەم ئارتۇقچىلىقلارنى كۈزىتىشكە،سىلىشتۇرۇشقا ياخشى مۇھىت يارىتىپ بەردى. دىمىسىمۇ بىزدە راست بەزى ئىللەتلەر باركەن. يەنى شۇ يات مەدەنىيەتتىكى ساۋاقداشلىرىمىزغا سىلىشتۇرغاندا بىز ھورۇنىراق ئىدۇق. لىكىن بۇ ھەم ئومۇمى ئەھۋال ئەمەس ئىدى، بىزدىمۇ شۇنداق بىر ياقتىن ئىشلەپ بىر ياقتىن ئوقۇيدىغان، ئائىلىسىدىن پۇل سوراش ئەمەس بەلكى ئائىلىسىگە پۇل ئەۋەتىدىغان تىرىشچان ئۇيغۇر ئوقۇغۇچىلار بار ئىدى. تۆت يىللىق ئوقۇشتىن كىيىن راستىمنى ئىيتسام ئۆزىمىزدە مىللەت سۈپىتىدە پۇتامىغا چىققۇدەك بىرەر كەمچىلىكنى ھىس قىلالمىدىم. بۇ يەردە پەقەت بىرلا ئىنىق پەرىقنى مىسال ئىلىش مۇمكىن. يەنى، بىز ئازلا بالا ئىدۇق، لىكىن ھەپتە ئاخىرىدا بىرگە پۇتبول ئوينايتتۇق. گەرچە كۆپىنچىمىزنىڭ تىخنىكىسى ناچار بولسىمۇ، قانداق كوماندا بىلەن ئوينايلى ئاساسەن ئۇتاتتۇق. بۇ يەردىكى ئاچقۇچ، مەيلى قانداق شەكىلىدىكى پۇتبول ئويۇنى بولسۇن، ئۆزىمىزنى ئۇرۇپ ئوينايتتۇق. قىنىمىز قىزاتتىكى بىر باشلىدۇقمۇ 2-3 سائەت توختىماي يۈگىرەپ ئوينايتتۇق. خەقلەر بىزنى بۇ شىنجاڭلىقلارنىڭ بەدەن ساپاسى ياخشى دەپ ماختىشاتتى، ئەمەليەتتە بىزمۇ شۇنداق ھاراتتۇق، شۇنداقتىمۇ ۋۇجۇدىمىزدىكى بىر خىل روھ قەدىمىمىزنى توختاتمايتتى، خەق بولدى قىلغۇچە بىز بولدى قىلمايتتۇق:-)

بېيجىڭدىكى ئوقۇشنى تاماملىغاندىن كىيىن داۋاملىق ئوقۇش ئۈچۈن گېرمانغا كەلدىم. سىنىپىمدا بىر لېتۋانىيەلىك ساۋاقدىشىم بولۇپ، ۋاسكىتبولغا بەكلا ئامراق ئىدى. كىيىن ئۇ ھەر جۈمە كۈنى سىنىپتىكى خىتاي بالىلارغا قوشۇلۇپ ئوينايدىغان بولدى. بىر كۈنى مەندىن سورايدۇ، بۇلار زادى قانداق مۇسابىقە ئوينايدۇ دەيدۇ، قارىسام بىر خىل نارازلىق چىراي. ئۇنىڭغا يارىمىغان يىرى: بۇلار پەقەت نومۇر سانىمايدىكەن، بەك جىم ئوينايدىكەن، بىر خىل ئۆلۈك ئاتمۇسفىرادا ئوينايدىكەن، نۇمۇر ئىلىپ ۋارقىراپ قويساڭ زاڭلىق قىلىپ كۈلىدىكەن دىگەندەك. ئاڭلاپ ئىچىمدە كۈلۈپ كەتتىم. ئەينى ۋاقىتتا بىيجىڭدا پۇتبول ئوينىغاندىمۇ بىزنىڭ جان تىكىپ ئوينىشىمىزنى شۇ خەقلەرمۇ بىر خىل ياۋايلىق تەرىقىسىدە قارايتتى. جۇڭگۇ پۇتبۇلىنىڭ مەغلۇبىيىتىنىمۇ شۇ يەردىن بىلەلەيسىز، پۇتبۇل بىر جىددى تەنھەركەت سۈپىتى بىلەن كىشىلەردىن زىرەكلىك، چاققانلىق ھەم چىداملىق تەلەپ قىلىدۇ، بۇ خىل تەلەپ تەبئىلا پۇتبولنى ئوتتەك ھاياجان، يۈكسەك قىزغىنلىق بىلەن باغلايدۇ. دىمەك بۇ خىل تەلەپ جۇڭگۇنىڭ 5000 يىللىق تارىخى بىلەن زىچ باغلانغان addiyliq/ottura-halliq ( 中庸之道) بىلەن ماس كەلمىسە كىرەك. ئەلۋەتتە بۇ خىل ھايات قاراش ياكى پەلسەپە ئىقىمنىڭ ئۆزىگە چۇشلۇق ئارتۇقچىلىقى بار. يوتقانغا قاراپ پۇت سۇنىدۇ، بەك ئاشۇرۋەتمەيدۇ، ھاراق ئىچسىمۇ مۇۋاپىقىدا ئىچىدۇ دىگەندەك. ماۋزىدۇڭمۇ ئەينى ۋاقىتتا ياپونلار بىلەن ئۇدۇل ئۇرۇشتىن ساقلىنىپ، "ئۇزاققا سوزولغان ئۇرۇش" تاكتىكىسى بىلەن بايقۇش ياپونلارنى يىللارنىڭ زىرىكىشلىك توزانلىرىدا ھالسىزلاندۇرۇپ ئاخىرى مەغلۇب قىلدى. مانا تەيۋەننىمۇ قايتۇرۋالىمىز دىگىلى قايۋاقىت، ئەگەر باشقا بىرەر ئەل بولغان بولسا ھازىرغىچە ئۇرۇش بولوپ بولاتتى بەلكىم. خەيىر بۇ توغرىسىدا ئۇزۇن توختىلىشنىڭ ئورنى يوق، پەقەت سەمىمىزگە سىلىپ ئۆتۈشلۈك بىر يەر بار. ئەينى ۋاقىتتا مۇئەللىم بىرەر ۋەزىپە بەرگەن بولسا، شۇ ساۋاقداشلىرىمىز قولىنىڭ ئۇچىدىلا قىلىپ قويىدىغان. ئۇلار ئۈچۈن شۇ ۋەزىپىنى پۈتۈرسىلا بولدى، جەرياننىڭ قانداق بولوشى، نەتىجىنىڭ قانداق بولوشى مۇھىم ئەمەس، مۇكەممەللىك قوغلاشمايتتى. ئەڭ كۆپ ئىشلىتىدىغان جۈملىسى "مۇنداقلا قىلىپ قويساق بولدىغۇ؛ قولنىڭ ئۇچىدىلا قىلىپ قويىلى" ( 凑合 凑合就行啦؛ 勉强一下) دىگەندەك. قارايدىغان بولساق، بۇ خىل قولىنىڭ ئۇچىدىلا قىلىپ قويۇش بۇلارنىڭ ھاياتىدىكى ھەممە تەرەپلەرگە سىڭىپ كەتكەندەك قىلىدۇ. شۇڭلاشقىمۇ بۇ دۆلەتتىن مۇشۇ كەمگىچە بىرەر نوبېل مۇكاپاتى ئالغان ئادەم چىققىنى يوق.

ئەمدى ئۆزىمىزگە كىلەيلى. بەلكى ئەڭ بۇرۇنقى بوۋىلىرىمىز چارۋىچىلىق بىلەن شۇغۇللانغاچقىمۇ، قىنىمىز بىر خىل قىززىق، مەن بۇنى تۆۋەندە ئات-مىجەز دەپ ئىزاھلايمەن. ئات --- ئۆي ھايۋانلىرى ئىچىدە ئەڭ سەزگۈر، ئەقىللىق، ئۈركىگەك(بىر نەرسە بەك ئاسان تەسىر قىلىدۇ) ھەم قارام. ھارۋىدىن قايتىپ كەتكەن ئاتنى ھارۋىغا قايتا ئۈگىتىش مۇمكىن ئەمەس دىسىڭىز بەك خاتالاشمايسىز؛ ئات گۆشى يەپ باققانلار بىلىشى مۇمكىن، قىنىنىڭ رەڭگى زىيادە قىزىل بولىدۇ، تەبئىتى ئىسسىق. بۇ خىل ئات-مىجەز مەدەنىيەت قەھىرمانلىقنى ئۇلۇغلايدۇ. ھىلە-مىكىر بىلەن تازا خوشى يوق، ئەكسىنچە چۆچەكلەردە ھىلە-مىكىر پەقەت جادىگەرلەرنىڭ ئالاھىدىلىكى. بۇ يەردە بۇ خىل قىززىققانلىقنىڭ كەمچىلىكىدە توختالغۇم يوق. ئەڭ مۇھىمى مۇشۇ خىل ئالاھىدىلىك ھازىرقى ئۇيغۇر مەدەنيىتىدە قانداق ئۆز ئىپادىسىنى تاپقانلىقى ئۈستىدە ئازىراق سۆز قىستۇرغۇم بار. مەنچە بىزدىكى قىززىقانلىق بىزدىكى كەسىپچانلىقنىڭ ئالاھىدە بولوشىغا بىۋاستە ئاساس بولغان. تۆۋەندە بۇ قاراشنى قۇۋۋەتلەش ئۈچۈن ئۆزىمىزگە تونۇشلۇق بىر قانچە مىساللارنى ئالدىم:

تەنھەركەت تۈرلىرىدىكى قىززىققانلىقىمىزنى ئابىيام توختىلىپ ئۆتتۈم، گەرچە ئۇ پەقەت ئوقۇۋاتقان ئوقۇغۇچىلارنىڭ بىر مىسالى بولسىمۇ، جۇڭگۇ تەنھەركەت ساھەسىدىكى ئۇيغۇرلارنىڭ مۇۋەپپەقيەتلىرىلا بىزگە فىزىئولوگىيەلىك جەھەتتىكى ئۇيغۇر قىزىققانلىقغا يىتەرلىك ئىسپات بولىدۇ دەپ ئويلايمەن. دىمەك بۇنىڭ ئۆزى بىر كەسىپچانلىق، شۇنداق قىززىققان بولوشىڭىزنىڭ ئۆزى شۇ كەسىپكە ئۆزىڭىزنى بىغىشلىغانلىق بىلەن ئوخشاش ئەمەسمۇ؟!

سەنئەت، بولوپمۇ ئۇسسۇل ئەزەلدىن ئۆزىگە ئوتتەك قىزغىنلىق (passion) نى بەلگە قىلىدۇ. ھاياجاننى، قىزغىن ھىسسىياتنى ئىپادىلەش ئۇنىڭ نىشانى. ئىسپانلارنىڭ تانگوسى، برازىليەلىكلەرنىڭ سامباسى ھەم ئافرىقىلىقلارنىڭ يەرلىك مىللى ئۇسۇللىرى ئۇلارنىڭ تەنھەركەت تۈرلىرىدە قولغا كەلتۈرگەن نەتىجىلىرىنىڭ ئارقىسىدا. مەيلى قايسىنى مىسالغا ئالايلى، مۇكەممەللىكنىڭ چېكى يوق، يەنى ھەر قانداق بىر ئارتىس ئۆز ھەركىتى ئارقىلىق ئىنسان فىزىئولوگيىسىگە جەڭ ئىلان قىلىپ تۇرىدۇ. بۇ خىل ئۆزىنى ئۇرۇش، بارلىقىنى بىغىشلاش ھەر قانداق بىر كەسىپ ئىگىسىدە بولوشقا تىگىشلىك نەرسە. بىر قىتىم ئافرىقىلىق بىر دوستۇم بىر تۈركلەرنىڭ توي مۇراسىمىغا قاتنىشىپ كەپتىكەن، خوشاللىقىنى باسالمايلا قاپتۇ. ئۇنى ھەممىدىن خوش قىلغىنى تويدىكى ئۇسسۇل بوپتۇ، خۇددى ئۆزىنى ئافرىقىغا بىرىپ كەلگەندەك ھىس قىلىپ كىتىپتۇ، دىيىشىچە ئافرىقىدىمۇ توي بولغاندا ئۇسسۇل ھەممىدىن ئەۋجىگە چىقىدىكەن. ئەمدى ئۇيغۇر ئۇسسۇلىغا قارايدىغان بولساق ئۆزىمىزدىن پەخىرلەنمەي تۇرالمايمىز. ئۇيغۇر ئۇسۇلىنىڭ ئەڭ بۇرۇنقى شەكىللىرنى تەڭرىتاغلىرىنىڭ قىياتاشلىرىدىن تاپمىز، شۇ ئەجداتلىرىمىز ئۇزۇن زامانلار مابەينىدە شۇنچىلىك تەرەققى قىلغۇزغان ئىدىكى، ھازىرغا كەلگەندە تۈرىنىڭ موللۇقى، شەكلىنىڭ كۆپ خىللىقى بىلەن دۇنيا مەدەنىيىتىدە ئۆزىگىچە ئورۇن تۇتىدۇ. بۇ خىل ئۇسسۇلغا ھىرىسمەنلىك بىزگە ھەرقانداق يىڭىچە شەيئىگە يۈكسەك ئىشتىياق بىلەن قارايدىغان خاراكتېرنى سىڭدۈرگەندەك قىلىدۇ. بۇ يەردە بىر نەرسىنى قىستۇرۇش ئارتۇقچە بولماس. بىزدىكى مودا قوغلىشىش، رەڭگە بولغان سەزگۈرلۈك بەكلا ئالاھىدە، بۇ جەھەتتە ئىتاليىلىك بىلەن فرانسوزلاردىن ھەرگىز قىلىشمايمىز. ئالدىنقى ئەسىرنىڭ 30-يىللىرىدا روسلارنىڭ تەسىرى بىلەن كىرگەن شەپكە، كاستۇم بۇرۇلكا كىيىش پەقەت نەچچە يىلدىلا ئومۇملاشقان بولسا، ئۇ نەرسىلەر بىزدىن نەچچە ئون يىل بۇرۇن كىرگەن شاڭخەيگە تەخمىنەن يىرىم ئەسىردىن ئۇزۇن ۋاقىتتىمۇ تامامەن ئومۇملىشىپ كەتمىگەن(بۇنى بىر ماقالىدە ئوقۇغان ئىدىم).

مەيلى ئۇيغۇر زەرگەر بولسۇن، بىناكار ئۇستىسى بولسۇن، ناۋايچى، باغۋەن بولسۇن، ئەڭ ئاددىسى موزدۇزچى، مايلامچى بولسۇن ئۇلاردىكى كەسپىچانلىقنى باشقا يەردىن ئاسان تاپالمايسىز. راستىمنى ئىيتسام بۇ تەرەپلەرگە بۇرۇن تازا دىققەت قىلىپ كەتمەپتىكەنمەن. بىلىملىك كىشىلەر بىلەن پاراڭلىشىش ئادەمگە كۆپ پايدا بىرىدۇ زادى. بىر قىتىم فىزىكا پەنلىرى بويىچە دوكتۇر ئاشتى مەمەتئىمىن ئابباس ئاكىمىز بىلەن بىر پاراڭلىشىپ قالدۇق. پاراڭ داۋامىدا مەمتىمىنكام ئۈرۈمچىدىكى ئاياغ مايلايدىغان بالىلارنىڭ گىپىنى چىقىرىپ قالدى. " قاراڭلار شۇ بالىلارغا، گەرچە شۇ ئىشلارنى ئامالسىزلىقتىن قىلۋاتقان بولسىمۇ شۇنداق بىر زوق، شۇنداق بىر ئىشتىياق بىلەن قىلىدۇ، ئاخىرىدا قىلغان ئىشىدىن پۇتاق تاپالمايسىز؛ ئادەملىرىمىزدە ئۆز كەسپىگە بولغان قىزغىنلىق ئالاھىدە..." شۇنىڭدىن كىيىن ھەر قىتىم ئۈرۈمچىدىن ئۆتكىنىمدە دۆڭكۆۋرۈك دوقمۇشىدىكى شۇ بالىلارغا بىر ئايىقىمنى مايلىتىپ ئۆتىدىغان بولدۇم. مەمتىمىنكامنىڭ دىگەنلىرى راست ئىدى، ئۇلار شۇنداق ئىشتىياق بىلەن بېرىلىپ قىلاتتى، ئۆز ھەققىنى ھالاللاپ ئالاتتى. گەرچە 50 تىيىنلىق ئىش بولسىمۇ سىزنى رازى قىلىپ يولغا سالاتتى. بىر تەرەپتىن ئۇلارنىڭ شۇ خىل روھىغا چەكسىز ھۆرمىتىم قوزغالسا، يەنە بىر تەرەپتىن " (مەكتەپتە) ئوقۇشنى خالامسەن؟" دىگەن سۇئاللىرىمغا ئۈنچىقماستىن بىر خىل ئامالسىزلىق ئارلاشقان كۆزلىرىنى ئىتتىك قاچۇرۇپ بىشىنى لىڭشىتىپ قويغان سىياقى ئىچىمنى ئاچچىق قىلاتتى...

كىچىك ۋاقتىمىزدا بىر تەبىئەت دەرىسى بىرىدىغان مۇئەللىمىمىز بولىدىغان. بىر كۈنى ۋەلىسپىتىگە كىچىك ماتور ئورنىتىۋاپتىكەن، ۋەلىسپىت موتۇرغىلا ئايلىنىپتۇ. ئۇ چاغدا يىزىمىزدا موتۇر يوق ئىدى، ئۇنداق نەرسىلەرنى كىنولاردا كۆرۈپ قالاتتۇق. ئۇ مۇئەللىمىمىزنىڭ قىلغان ئىشى بىزگە خىلىلا ئىلھام بولغان ئىدى، قىزىقىشىمىزنى باسالماي ئارقىسىن يۈگرەپ يۈرگەن ئىدۇق. بۇنداق مىساللار بىزدە ئاز ئەمەس. تىخى نەچچە يىللارنىڭ ئالدىدىلا تۇرپاندىكى بىر فىزىكا مۇئەللىمى ئۆزى ئايرۇپىلان ياساپ مۇۋەپپەقىيەت قازاندى. گەرچە ئۇ ئايرۇپىلان بىر ئىپتىدائى شەكلىدە بولسىمۇ، بىزنىڭ شارائىتىمىزدا شۇنداق بىر ئىشنى قىلىش ھەقىقەتەن ئاسانغا توختىمايدۇ. بۇ شۇ قېرىندىشىمىزنىڭ ئۆز قىزىقىشى ئۈچۈن ھىچنەرسىدىن قورقمايدىغان روھىنى، ئۆز كەسپىگە ئوتلۇق مۇھەببىتىنىڭ بارلىقىنى ئىسپاتلاپ تۇرۇپتۇ. مانا بۇمۇ ئۇيغۇردىكى كەسىپچانلىقنىڭ يەن بىر ئىپادىسى. دەل خەلقىمىزدە مۇشۇنداق كەسپىچانلىق روھى بولغاچا، بىزدە تولوق بىر زامانىۋى سىمفونىيە ئورۇنلاشقا يەتكۈدەك مىللى چالغۇلار بار؛ دۇنيانىڭ نەرىگە ئاپارسە خەقنىڭ كۆزىنى قاماشتۇرغۇدەك گىلەملىرىمىز بار؛ رەڭدارلىقنى ئۆزىگە مۇجەسسەم قىلغان دوپپىلىرىمىز، ئەتلەسلىرىمىز بار؛ ئۆزىمىز تارىختىن بۇيان يىتىشتۈرگەن 800 دىن ئارتۇق ئۈزۈم سورتى بار؛ يەنە ئىيتىپ تۈگىتىپ بولمايدىغان قول-ھۆنەرۋەنچىلىك بۇيۇملىرى بار...

دادامنىڭ ماتۇر ھەيدەشتىن باشقا ھۆنىرى يوق ئىدى، لىكىن دادامنىڭ بىزنى ھەممىدىن قايىل قىلىدىغان يىرى، مەيلى نىمە ئىش قىلسۇن ناھايتى تۈجۈپلەپ، ئىنچىكە قىلاتتى. تام سوقساق پىششىق بولمايدۇ دەپ بىزنى ھارغۇچە چىڭدىتاتتى، يەنە شۇنىڭغا ئىشەش قىلماي بىزدىن كىيىن ئۆزى چىقىپ يەنە چىڭدايتتى. ھويلىغا سەۋزە تېرىمىز دەپ كۈرەك بىلەن يەر ئاغدۇرساق بەك چوڭقۇر بولۇشىنى تەلەپ قىلاتتى، بىزمۇ تەلەپكە يىتىش ئۈچۈن بار كۈچىمىز بىلەن كۈرەكنى تېك باساتتۇق. دادامنى ئەمدى رازى بولىدۇغۇ دەپ تۇرساق، كىلىپلا كۈرەكنى بىرلا سانجىپلا يەنە تېيىز بولوپ قاپتۇ دەيىتتى، رازى بولغان تەقدىردىمۇ چىرايىغا چىقارماي كىتىپ قالاتتى، شۇنىڭ بىلەن تىخىمۇ تىرىشاتتۇق. ئىنىم ئوقۇشقا قىزىقماي ئۆيدە مال-ۋارانغا قاراپ قالدى، لىكىن شۇ ئىنىممۇ مىنى قول قويغىزىدۇ. ئۆزى ئاتقا ئامراق، مەھەللىمىزدە بىرەر يۈزدىن ئارتۇق ئات بار، 600 دىن ئوشۇق كالا بار. بۇ ئىنىم يىراقتىنلا مەيلى كالا بولسۇن ئات بولسۇن كىمنىڭلىكىگە ھۆكۈم قىلىپ بولىدۇ (ماڭا نىسبەتەن ھەممىسى ئوخشاشلا رەڭدە)، قويلارنىڭ يىلىنىنى تۇتۇپ كۆرۈپلا قاچان قوزىلايدىغانلىقىنى دىيەلەيدۇ.كۆرۈپ تۇرۇپسىزكى، كەسىپچانلىق روھىنى سىز ئۇيغۇر جەميىتىنىڭ ئەڭ ئاددى ھۆجەيرىسىدىمۇ كۆرەلەيسىز. بۇنداق مۇكەممەلىككە ئىنتىلىش كەسىپچانلىق شەكلىدە بىزدە ئۆز ئىپادىسىنى شۇنداق ياخشى تاپقاندەك قىلىدۇ.

ئەمدى ئۆزىمىز تۇرۋاتقان دۆلەتلەردىكى خەلىقلەرگە بىر سىلىشتۇرۇپ كۆرەيلى، بىزدىكى كەسىپچانلىق ئارتۇق تۇرسا تۇرىدۇكى كەم تۇرمايدۇ. شۇڭا قانداقلا بىر ئۇيغۇر پەرزەنتى دۇنيانىڭ نەرىگىلا بارسۇن، ۋەتىنىنى باشقا ھەرقانداق بىرىدىن ئۆتە سېغىنىدۇ، بىزنى سېغىندۇرغان پەقەت كاۋاپ بىلەن لەغمەنلا ئەمەس. بىزدىكى كەسىپچانلىقنى ئۆزىگە ئاساس قىلغان شۇنداق مول مەدەنىيەت باشقا يەرلەردىن ئاسان تىپىلمىغاچقىلا ۋەتەننى ھەرقانداق بىرىدىن ئالدىراپ سېغىنىمىز، مەيلى بىزدىكى ئىسسىق خاراكتىر بىزنى باشقىلار بىلەن تىزلا يىقىن قىلىپ زىرىكتۈرمىسىمۇ يەنىلا ۋەتەننى سېغىنىمىز:-)

خاتېمە سۈپىتىدە ئوقۇرمەنگە ئىيتىدىغىنىم، ئۆز كەسپىمىزگە پىششىق بولايلى، ئۆز كەسپمىزنى ھاياتنى قانداق سۆيسەك شۇنداق سۆيەيلى. شۇ مايلامچى بالىلاردىكى كەسىپ روھى بىزدىمۇ ئارتۇقى بىلەن بولسۇن! دىققەت قىلايلى، بىزگە يىقىن خوشىنىلارنىڭ "قولىنىڭ ئۇچىدىلا" ئىش قىلىدىغان ئىللەتلىرى بىزگە يۇقۇپ قالمىسۇن. بوۋىمىز مەھمۇد قەشقىرى ئۆزىنىڭ ئالامشۇمۇل لۇغىتىنى يىزىش ئۈچۈن 15 يىل يۇرت كەزگەن ئىكەن، شۇ ئاتا-بوۋىلىرىمىزدىن قالغان كەسىپچانلىق بىزگە كەلگەندە توختاپ قالمىسۇن! ئۆزىڭىزدىن ھەر دائىم سوراپ تۇرۇڭ، كەسپىڭىزگە قانچىلىك پۇختا بولدىڭىز؟ كەسىپىڭىز ئۈچۈن قانداق ئاساس سىلىۋاتىسىز؟


ئوغلاق ئىيىنىڭ 23-كۈنى، شەھرى ئۇلم.


_________________
ilxatérem


Eng axirqi qétim oghuzkb teripidin 24.11.09 4:07 da özgertildi, jem'iy 1 qétim özgertildi.
Choqqigha qaytish Go down
http://www.uni-ulm.de/~bkuerban/
Iltemish
3.noruz
avatar

Yézilmilar Sani : 61
töhpe : 130
tizimlatqan waqti : 2009-09-30
Orni : the Netherlands

YollashMawzu: Re: uyghurda kesipchanliq   23.11.09 16:27

Uyghurlarning kesipchanliqi Uyghurlarning qizghin, tirishchan, tujumel mijezining sewebidindur(BU yuqurqi maqalidin his qilghanlirim). Mundaqche qilip iyitqanda, biz bir kesipchanliqi kuchluk millet!

Maqalini oqush jeryanida nurghun mezmunlarni oz tejirbem bilen silishturmay turalmidim. 14 yishimdin tatip oydikilerdin ayrilip ichkiride oquptimen, xuddi Abdukirim Abliz ipizotida guhnini ozide qoymay Sheytangha donggidi digendek, menmu ozemdiki (bezi ishlarni) eplep-seplep otkuziwitidighan illetlirimni, shu uzaq yillliq imtihan uchun ugunidighan, shekilwazliq bilen toshqan muariptin kormey turalmaymen. Ras gepni qilsam, hilimu bezi ishlarni eplep-seplep otkoziwitip qalimen (elwette u ish otup ketkendin kiyin xata qilghinimni his qip kiyin choqum diqqet qilay deymen, likin kiyinki qitim yana oxshash qedemlerni basimen Very Happy).

Towende maqalidiki bezi mesililerge qarashlirimni sozlep baqay Smile

Uyghurlarning yingi mewjudatlargha bolghan sezgurlikini rasla mediyleshke erziydu, bu rastinla bizning qizghin mijezimizning simowli. Likin hemme ishning yaxshi yaman teripi bolghandek, bu xil yingiliqni qobul qilish rohimu az awarechiliq ilip kelmidi, meslen tilimizdiki bashqa tildin kelgen sozlerning sani barghansiri ashmaqta; Koriyening kinosi dangliq bolushi bilen hemme kiyim modisigha Koriye pasoni dep isim qoyuldi. Elwette modighu daim ozgurup turidu, moda qoghlishishni yaman ish dep ketkili bolmaydu, likin modidin bashqa, bezi ademlerning oy pikiri, koz qarishi, meydanimu bek tiz ozgurup turididu. Bumsu yingi sheyiy lerni bek tiz qobul qiliwalghanliqning sewebi dep qaraymen.

Oz kespige bolghan qizghinliq Uyghur yashliri arisida bir kongul bolishke tigishlik mesile. Men aly mektep imtihanida ozem oquymen digen kesipke baralmighan, hazirqi kespim(Matimatka, Statiska) ni unche och kormigechke, boldi dep oquwergen. Chetke chiqishning aldida oqush mukapati ilish mumkinchilikini yoq bolmisun dep, yenila oz kespimni oquwerdim(Bashqa nime kesip oqushni bilmigen idim). Emdige kelgende Matimatka oquwatqili 6 yil bolay deptu, hazir ozemning nimini eng yaxshi koridighinimni, nime kesip bilen utuq qazinalaydighinimni bilmeymen, likin birdin bir bilidighinim Matimatka herqandaq kesipke birip chitilidighan, eng muhim kesiplerning biri, buni yaxshi ugensem kelguside ach qalmaymen bil

Aly mektep oqughanda , etrapimda nurghun oynap yurgen sawaqdashlirim (Uyghurlar) bar idi, 45 numur bilen imtihandin otush, her qitimqi imtihan waqtidiki eng qizghin soz timisigha aylinatti (Mektepning atalmish az sanliq milletlerge qilghan yardimi). Likin bundaq passip haletni putunley ulardin korushkimu bolmaydu. Meslen mining ela netije bilen putturup ketken sawaqdashlirimgha xizmet yoq, arqa ishik qilip aly mektepke barghan sawaqdashlirim yene ata anisining yardimi bilen chong doxtur bolup ishlimekte; Mashiniasazliqta oqughan sawaqdashlirim Xenzu tili deris biriwatidu, qatarliqlar. Mushundaq her xil sewepler tupeylidin, kopinche Uyghur oqughuchilar ozining qiliwatqan ishigha, yaki ozining kespige ishenmeydu, kelgusige ishenmeydu, bundaq ishenmeslik kespige bolghan qizghinliqni ajizlashturiwitidu. Shu tupeyli kespige bolghan qizghinliq barghansiri towenlep kitiwatidu. We belki shu tupeyli bizning "Oghuzbk"jan ademni righbetlenduridighan bu maqale yazdi~ Very Happy Gerche siritqi amillarni ozgertelmisekmu, Uyghurlarning kesipchanliqi kuchluk millet ikenlikini tonushturush, shu sawaqdashlirimning kesipchanliqini kuchlendurushtiki birinji qedem dep qaraymen.

Eng axirida dimekchi bolghunum, men ozemning kespimni gerche "maylamchi balilargha" oxshash qizghinliq bilen ugunelmisemmu (elwette shundaq qilishqa tirishimen), likin men ozemning kespige ishinimen, kelgusige ishinimen. Belkim ozemni az tola bir nerse bilimen dep oylighan kuni bu kesipni tiximu yaxshi koremen.

Bek yaxshi maqale boptu, men bashqilarghimu tewsiye qilimen!
Choqqigha qaytish Go down
korshat
8.tomuz
avatar

Yézilmilar Sani : 325
töhpe : 615
tizimlatqan waqti : 2009-05-31
yishi : 34
Orni : Deutschland

YollashMawzu: Re: uyghurda kesipchanliq   24.11.09 2:37

men kunni eplepla otkuzdighan, herqandaq ishni qolumning uchidila qilidighan balilarning eng tipik misali, men mushunda kun otkuzup hazirghiche mingip keldim, emma konglum tuyup turidu haman bir kuni chanimen. haman bir kuni mushundaq mesulyetsiz oqughinimning ziynini tartimen. emma konup qalghan ikenmen, imtahan uchunla uginimen, imtahandin otsem boldi kinishke alsam boldi. hizmetke chiqqandimu shundaq bolidighu dep oylaymen. bu oylighinimning xata ikenlikini bilimen yu yene qilimen.
bu maqalini oqup ozumning uyghurluq xaraktirimni yoqtip qoywatqinimgha xijil bolwatimen.

_________________
Büyük insanlar yingi pikirlerni tartishar,
Normal insanlar Netijini tartishar,
Kichik insanlar Kishilerni tartishar.
Choqqigha qaytish Go down
Iltemish
3.noruz
avatar

Yézilmilar Sani : 61
töhpe : 130
tizimlatqan waqti : 2009-09-30
Orni : the Netherlands

YollashMawzu: Re: uyghurda kesipchanliq   24.11.09 16:11

korshat wrote:
men kunni eplepla otkuzdighan, herqandaq ishni qolumning uchidila qilidighan balilarning eng tipik misali...

Hey miningche hemmimizde ba bundaq kemchillik, bezide horunluqtinmu korimen! yene bir tereptin iyitqanda biz ziyankeshlikke uchurghuchi Laughing (bashqilagha donggesh yana bir yaman aditimmu nime )
Choqqigha qaytish Go down
oghuzkb
10.oghuz
avatar

Yézilmilar Sani : 400
töhpe : 846
tizimlatqan waqti : 2009-05-31
yishi : 37
Orni : Ulm, Germany

YollashMawzu: Re: uyghurda kesipchanliq   25.11.09 17:47

bu témini bailargha azraq ilham bolsun dep yazsam, hemminglar xuddi Russu (Rousseau) dek "Confession" qilipla chüshüp kitipsilerghu. emdi shu 24 sa'et üginish qilghili bolmaydude:-D

mandaq kishilierni ümidlendüridighan ishliringlar yoqmu?:-)

_________________
ilxatérem
Choqqigha qaytish Go down
http://www.uni-ulm.de/~bkuerban/
Sponsored content




YollashMawzu: Re: uyghurda kesipchanliq   

Choqqigha qaytish Go down
 
uyghurda kesipchanliq
Aldinqi Téma Kéyinki Téma Choqqigha qaytish 
1. bet (jem'iy 1 bet)

Permissions in this forum:Bu sehipidiki yézilmilargha jawab yazalmaysiz.
Uyghur Oqughuchilar Munbiri :: Yazmilar-
Buninggha ötüsh: